ربیع بن سلیمان رحمتہ اللہ علیہ
حضرت ربیع بن سلیمان رحمۃ اللہ علیہ فرماتے ہیں کہ میں حج کے لیے جا رہا تھا میرے ساتھ میرے ساتھی بھی تھے جب ہم کوفہ پہنچے تو میں کوفہ کے بازاروں میں ضروریاتِ سفر خریدنے کے لیے گھوم رہا تھا کہ میں نے ایک۔عجیب منظر دیکھا ایک ویران سی جگہ میں ایک خچر مرا ہوا تھا اور ایک عورت جس کے کپڑے بہت پرانے بوسیدہ سے تھے چاقو لیے ہوئے اُس کے گوشت کے ٹکڑے کاٹ کاٹ کر ایک زنبیل میں رکھ رہی تھی مجھے یہ خیال ہوا کہ یہ مردار گوشت لے جا رہی ہے اس پر سکوت ہر گز نہیں کرنا چاہیے شاید یہ عورت لوگوں کو یہ ہی پکا کر کھلاتی ہو سو میں چپکے سے اس کے پیچھے ہو لیا اس طرح کہ وہ مجھے نہ دیکھے وہ عورت ایک بڑے مکان میں پہنچی جس کا دروازہ بھی اونچا تھا اس نے جا کر دروازہ کھٹکھٹایا اندر سے آواز آئی کون ہے؟ اس عورت نے بولا دروازہ کھولو میں بد حال ہوں دروازہ کھولا گیا اور گھر میں چار لڑکیاں نظر آئیں جن کے چہرے سے بد حالی اور مصیبت کے آثار ظاہر ہو رہے تھے وہ عورت اندر آ گئی اور زنبیل اُن لڑکیوں کے سامنے رکھ دی
میں کواڑوں کی درزوں سے جھانک رہا تھا میں نے دیکھا اندر سے گھر بلکہ برباد اور خالی تھا اُس عورت نے روتے ہوئے لڑکیوں سے کہا اِس گوشت کو پکا لو اور اللہ کا شکر ادا کرو وہ لڑکیاں گوشت کاٹ کاٹ کر اُس کو آگ پر بھوننے لگیں مجھے بہت تکلیف ہوئی میں نے باہر سے آواز دی اے اللہ کی بندی اللہ کے واسطے اِس گوشت کو نہ کھا وہ کہنے لگی تُو کون ہے ؟ میں نے کہا میں ایک پردیسی آدمی ہوں اُس نے جواب دیا تُو ہم سے کیا چاہتا ہے ؟ 3 سال سے نہ ہمارا کوئی معین ہے اور نہ کوئی مدد گار ہے تو کیا چاہتا ہے ؟ میں نے کہا مجوسیوں کے ایک فرقہ کے سِوا مردار کا کھانا کسی مذہب میں جائز نہیں وہ عورت کہنے لگی ہم خاندانِ نبوت کے شریف سید ہیں اِن لڑکیوں کا باپ بڑا شریف آدمی تھا وہ اپنے ہی جیسوں سے اِن کا نکاح کرنا چاہتا تھا لیکن نوبت نہ آئی اُس کا انتقال ہو گیا جو ترکہ اس نے چھوڑا تھا وہ سب ختم ہو گیا ہمیں معلوم ہے کہ مردار کھانا جائز نہیں لیکن اضطرار میں جائز ہوتا ہے ہمارا چار دن کا فاقہ ہے حضرت ربیع بن سلیمان رحمتہ اللہ علیہ فرماتے ہیں اس کے حالات سُن کر میں بے چین ہو گیا اور اپنے ساتھیوں سے آکر کہا میرا تو حج کا ارادہ نہیں رہا سب نے سمجھایا لیکن میں نے کسی کی نہیں سنی میں نے اپنے کپڑے اور احرام کی چادریں اور جو سامان میرے ساتھ تھا وہ سب لیا اور نقد چھ سو درم تھے وہ لیے اور ان میں سے سو درم کا آٹا خریدا اور باقی درم آٹے میں چُھپا کر اُس بڑھیا کے گھر پہنچا اور یہ سب سامان اور آٹا وغیرا اس کو دے دیا اس نے شکریہ ادا کیا اور کہنے لگی اے ابنِ سلیمان رحمتہ اللہ علیہ اللہ تیرے اگلے پچھلے گناہ معاف کرے اور تجھے حج کا ثواب عطا کرے اور اپنی جنت میں تجھے جگہ عطا فرمائے اور ایسا بدل عطا فرمائے جو تجھے بھی ظاھر ہو جائے حضرت ربیع بن سلیمان رحمتہ اللہ علیہ فرماتے ہیں حج کا قافلہ روانہ ہو گیا میں اُن کے استقبال کے لیے کوفہ ہی رُکا رہا تا کہ اُن سے اپنے لیے دعا بھی کرواوں جب حجاج کا ایک قافلہ میری آنکھوں کے سامنے سے گزرا تو مجھے اپنے حج سے محروم رہ جانے پر بہت افسوس ہوا اور رنج سے میرے آنسو نکل آئے جب میں اُن سے ملا تو میں نے کہا اللہ تعالٰی تمہارا حج قبول کرے اور تمہارے اخراجات کا تمہیں بدلہ عطا فرمائے اُن میں سے ایک نے کہا کہ یہ کیسی دُعا ہے ؟ میں نے کہا اُس شخص کی دعا جو دروازہ تک کی حاضری سے محروم ہو وہ کہنے لگے بڑے تعجب کی بات ہے اب تُو اِس سے بھی انکار کرتا ہے کہ تُو ہمارے ساتھ عرفات کے میدان میں نہ تھا ؟ تُو نے ہمارے ساتھ رمی جمرات نہیں کیا؟ تُو نے ہمارے ساتھ طواف نہیں کیے ؟ میں اپنے دل میں سوچنے لگا یہ اللہ کا لُطف ہے اتنے میں میرے شہر کے حاجیوں کا قافلہ آ گیا میں نے کہا اللہ تعالٰی تمہاری سعی مشکور فرمائے تمہارا حج قبول فرمائے وہ بھی کہنے لگے تُو ہمارے ساتھ عرفات میں نہیں تھا ؟ رمی جمرات نہیں کی تُو نے ہمارے ساتھ ؟ اب تو انکار کر رہا ہے اُن میں سے ایک شخص آگے بڑھا اور کہنے لگا بھائی انکار کیوں کرتے ہو ؟ تم ہمارے ساتھ مکہ مکرمہ میں نہیں تھے یا مدینہ منورہ میں نہیں تھے ؟ جب ہم حضور نبی کریم صلی اللہ علیہ وآلہ واصحابہ وسلم کی قبر اطہر کی زیارت کر کے بابِ جبرائیل علیہ السلام سے باہر کو آ رہے تھے اُس وقت اژدھام کی کثرت کی وجہ سے تم نے یہ تھیلی میرے پاس امانت رکھوائی تھی جس کی مہر پر لکھا ہوا ہے مَن عَاملَنَا رَبَحَ جو ہم سے معاملہ کرتا ہے نفع کماتا ہے اس نے کہا یہ لو اپنی تھیلی واپس حضرت ربیع بن سلیمان رحمۃ اللہ علیہ فرماتے ہیں میں نے اُس تھیلی کو کبھی اس سے پہلے دیکھا بھی نہ تھا اس کو لے کر میں گھر واپس آیا عشاء کی نماز پڑھی اپنا وظیفہ پورا کیا اِسی سوچ میں جاگتا رہا کہ آخر یہ قصہ کیا ہے ؟ اِسی کشمکش میں میری آنکھ لگ گئی تو میں نے حضور نبی کریم صلی اللہ علیہ وآلہ واصحابہ وسلم کی خواب میں زیارت کی حضور نبی کریم صلی اللہ علیہ وآلہ واصحابہ وسلم نے تبسم فرماتے ہوئے ارشاد فرمایا اے ربیع بن سلیمان رحمتہ اللہ علیہ آخر ہم کتنے گواہ اِس پر قائم کریں کہ تُو نے حج کیا ہے ؟ تُو مانتا ہی نہیں بات یہ ہے کہ جب تُو نے اُس عورت پر جو میری اولاد میں سے تھی خرچ کیا اور
اپنا حج کا ارادہ ملتوی کیا تو اللہ تعالیٰ نے اس کا نعم البدل تجھے عطا فرمایا اللہ نے ایک فرشتہ تیری صورت بنا کر اُس کو حکم دیا کہ وہ قیامت تک ہر سال تیری طرف سے حج کیا کرے اور دنیا میں تجھے یہ عوض دیا کہ چھ سو درم کے بدلے چھ سو دینار اشرفیاں عطاء کیں حضرت ربیع بن سلیمان رحمۃ اللہ علیہ فرماتے ہیں جب میں سو کر اٹھا تو اس تھیلی کو کھول کر دیکھا تو اس میں چھ سو اشرفیاں موجود تھیں
0 Comments